據行政會議成員個人利益登記冊顯示，政制及內地事務局局長「林公公」林瑞麟喺六月八號向行會秘書處申報，同家人購入一個位於英國倫敦嘅住宅物業樓花，物業將於今年十一月落成，佢打算攞物業作出租用途。政府喺六月七號公布將政改方案提交立法會，以趕及二十三號表決，佢就喺八號申報新物業，兩個標誌性日子咁相近，唔通佢處理政改同炒樓係同步進行？老實講，政改鬧得風風火火，身為重要旗手嘅林公公仲有閒情投資物業？橫掂佢炒樓咁有心得，不如以後開班教人炒樓，好過搞政改啦！
翻查紀錄，自八九年至今，佢先後買入七個住宅物業，而且專攻升值潛力大嘅南區同中半山，其中五個已轉售，僅一單位損手，其餘四個均有斬獲，最和味嗰次係九一年以三百二十二萬元買入淺水灣華景園連車位，○五年賣出時淨袋八百五十八萬元，炒樓二十年共賺一千一百萬元。如果佢處理政務都咁精明，咁就真係港人之福囉。
再睇吓申報表，行政會議召集人CY梁振英喺六月七號通知秘書處，太太唐青儀喺英國Kensington擁有一個住宅物業，係自住用途。
此外，環境局局長邱騰華五月十一號向行會申報，其妻以公司名義擁有一個位於灣仔區嘅住宅單位，現作為出租用途。五月正係政府推出遏抑樓價措施後，樓價稍稍放緩嘅時候，趁機入市可以理解，之但係，林公公係公認嘅官場炒樓王，佢棄港樓而取英倫，邱騰華反其道而行，小心坐艇喎！