匯賢智庫嘅立法會議員葉劉淑儀今年出咗本名叫《跟葉太學英語》嘅書，尋日喺書展搞簽名會，驟眼見葉劉嘅「粉絲」都唔少，有專程嚟買書返去學英文嘅「80後」，亦有由葉劉做貿易署署長已經好欣賞佢嘅支持者，而最搞笑係有個匯賢智庫嘅職員專登請假嚟畀驚喜葉劉。
「五散人」之一、立法會會計界議員「波波」陳茂波，亦喺簽名會完結前一刻趕到，仲一口氣買咗五本畀葉劉簽名，但唔係送畀佢班散人兄弟，而係送畀佢班實習同學仔。
葉劉話雖然波波係功能界別嘅議員，但佢知當年波波落區拉票亦流過唔少汗水，所以當佢係直選議員一樣，不嬲都好啱key喎。向來有鋪吸納精英癮嘅葉劉，仲話有興趣介紹佢囡囡畀波波喺劍橋讀法律嘅公子識添！
