上海菜喺中國八大菜系之首，位於灣仔世紀酒店嘅老上海飯店就深受老饕追捧。日前見到優質旅遊服務協會主席Tommy李應生同太子珠寶執董Joseph朱繼陶喺嗰度食午飯，原來Joseph都係協會執行委員兼市場推廣小組委員會主席，兩人約埋密斟會務，順便忙裏偷閒祭吓五臟廟。
Tommy係老上海嘅熟客仔，當日就叫咗至愛菜式同老友分享，包括油泡蝦、脆鱔、火瞳翅同六月黃炒年糕等，食到Joseph頻頻叫好。Tommy唔止識食，仲好識介紹菜式，佢話油泡蝦雖然係頭盤，但上碟時仲有餘溫，最抵讚係蝦殼香脆、肉爽鮮甜；脆鱔都係必食之選，廚師揀選成條黃鱔背脊肉嚟炸，香脆又夠大，火候控制一流。
窩火瞳翅係用又粗又爽嘅魚翅同靚絕嘅金華火腿一齊燉，兩人邊食邊讚有錢都食唔到！美食當前，Tommy一時興起叫咗餐廳自釀嘅陳年花雕，再佐以消滯嘅明前龍井，簡直係人生一大享受。