尋日同大家講過，公文袋今次派外籍人士司馬文出選南區區議員，社民連內部都覺得勝算唔高，收到風話佢哋之所以咁順攤唔企硬，純粹係因為公文袋應承咗，如果社民連肯讓路嘅話，公文袋就會讓司馬文曾經出選過嘅區議會司徒拔道選區畀佢哋。據悉，本身已經扎根灣仔區嘅社民連秘書長季詩傑對呢個選區極有興趣，所以任亮憲今鋪可能成為犧牲籌碼。

年輕行委唔聽毓民支笛

其實任亮憲同社民連唔咬弦早有迹可尋。季詩傑本來一心喺二○一二年出選港島，點知任亮憲突然喺維園出位，風頭一時無兩，殺咗佢一個措手不及。最慘係任亮憲成日同傳媒亂講嘢，連累個黨。佢曾經喺政改期間，話社民連要喺嚟緊嘅區議會全力狙擊白鴿黨，仲話四百幾個區都要派人落去選，搞多次公投。呢番話激到黨主席陶君行紮紮跳，搞到佢最後要即時出嚟吹淡風補鑊。

社民連禮拜日將就出缺嘅行政委員成員進行補選，雖然任亮憲依家唯一對手只係未夠二十歲嘅嚴敏華，但佢嘅勝算只係得五五波，一來社民連嘅行委都唔太buy佢，二來一班年輕黨員近日亦紛紛喺網上撰文聲援嚴敏華，更顯得任亮憲孤立無援。

任亮憲尋日喺書展為新書簽名，點知陶君行幾乎喺同一時間喺另一地點搞新書發布會，明搶佢客。任亮憲只係得前黨主席黃毓民撐場，陶君行嗰邊就有成班行委，再度形成一個強烈對比。

任亮憲爸爸係前立法局議員任善寧，好多人都知佢同毓民之間有唔少交情，已經成為前任主席嘅毓民固然想喺黨度睇住呢位「世姪」，但依家班年輕行委都唔多想毓民垂簾聽政，而毓民早前喺政改後，高調話社民連會退出區會協調同飯盒會，已經同班行委立場有所分歧。內部咁多矛盾又牽涉政治利益，社民連唔爆發內訌至奇！