十個月大女嬰蔡文茵患有罕見先天性單邊肺部發育不全綜合症，天生只有半邊肺功能，一出世就要靠呼吸機生存，每日都要同死神搏鬥，表現出頑強嘅生命力。事件經本報報道後，引起極大回響，慰問及捐款電話連日響個不停，唔單止本地讀者紛紛伸出援手，海外讀者亦越洋來電詢問茵茵情況及捐款方法。事實再次證明，愛心不分階層，亦不分疆界。

要醫治茵茵嘅病，需要喺氣管植入金屬支架幫助呼吸，可惜本港醫生從來未為嬰兒做過呢種手術，愛莫能助。好在天無絕人之路，台灣榮民總醫院做呢種手術有豐富經驗，但費用需要港幣四十萬元，絕非身為普通打工仔嘅茵茵父母所能負擔。有見及此，太陽報愛心基金及東方日報慈善基金及時伸出援手，登高一呼，應者雲集，無數讀者紛紛致電詢問捐款詳情，短短三日，兩個基金接獲捐款已突破六十六萬元，為小茵茵赴台醫病解決咗經濟問題，為小生命早日擺脫死亡威脅帶來希望。太一叮謹代表小茵茵及其家人向各位愛心讀者講聲：多謝晒！

病魔無情，人間有愛，善長仁翁嘅愛心確實令人感動。有位行動不便嘅老伯親自去銀行捐款，佢話自己從未試過捐錢幫人，但今次睇見個ＢＢ女咁精靈，點都要捐款幫佢；有位靠生果金生活嘅七旬長者，為咗表示心意，一千元生果金只留番六百元自用，其餘四百元捐畀小茵茵做手術；有讀者自己捐錢後，又發動親朋戚友齊齊獻愛心；有多位熱心讀者甚至承諾，如果最後善款不足，願意包底捐出餘額。而最令人感動嘅係，唔止本地讀者關心小茵茵，有來自澳洲、加拿大、台灣等地嘅讀者亦越洋捐款，為小茵茵送上關懷及溫暖。

同樣值得一提嘅係，當國泰航空公司常務總裁史樂山閱讀本報，得悉茵茵情況及經濟困境後，決定施予援手，願意向茵茵、其家人及醫療團隊免費提供往返台灣機票，仲會提供各種配套設施，成為國泰首次向有需要病人提供免費接載服務，認真唔話得。

來自四面八方嘅愛心，合力為小茵茵重燃生機，正如茵茵媽咪所講，「原來呢個世界一啲都唔冷漠，到處都充滿愛」，佢仲特別致函感謝《太陽報》同《東方日報》讀者嘅支持。冇錯，好多人都話香港人情薄過紙，其實計太一叮話齋，醉過方知酒濃，愛過方知情重，從今次咁多熱心讀者義助小茵茵可見，香江滿溫情，人間有希望。就以太陽報愛心基金及東方日報慈善基金為例，自成立以來已幫助無數弱勢市民渡過難關，呢啲就係香港人充滿愛心嘅最佳證明喇。小茵茵，加油呀！