本文重點
本港街頭巷尾都有唔少政黨街板，話自己「成功爭取×××」嚟表揚功績。日前，我哋喺深水埗發現一張街招，上面大大隻字寫住「取消區議會委任制」，左上方就圈住「成功爭取」，呢張街招上印咗民協立法會議員馮檢基（KK）官仔骨骨嘅玉照。據講，呢張街招喺深水埗隨處可見，民協咁樣搶功，真係抽水抽過龍噃！
仍處爭取階段
事關政府到家吓都未表明幾時取消委任制，而且留意政改動態嘅人都知道，喺政改過程中，焦點大部分時間都去咗同中央談判嘅白鴿黨身上，雖則民協都有份入中聯辦同副主任李剛會面，但係最終白鴿黨同中央談判成功卻係事實，但民協嘅街招卻話佢哋經過多年努力同把握政改嘅機會，成功爭取政府喺十月進行政改本地立法嘅時候，提出取消區議會委任制建議，而佢哋亦會爭取一次過取消。
尋日KK同署理政務司司長林公公見面，亦有講取消委任制，可見依家仍處爭取階段，又何來「成功爭取」？難怪有網民喺交友網站facebook上留言，指民協「厚顏」到如此地步，仲打算遲啲喺區內派發單張，批判民協。