本文重點
異鄉人大都戀戀鄉情，偏偏好多人嘅成長歷程就係走南闖北，好似新世界中國地產執行董事方承光太太商蕾咁，佢喺上海出生，香港長大，跟住去咗美國讀書，中西美食試過唔少，但佢最回味嘅都係家鄉寧波嘅菜，仲好鍾意去寧波旅港同鄉會食家鄉菜添。
愛幫襯寧波同鄉會
方太最愛食寧波同鄉會嘅炒年糕，十指纖纖嘅佢都會入廚煮番幾味，炒年糕都難佢唔倒。方太話，炒年糕最緊要炒得夠煙韌，所以火候嘅控制好緊要，呢方面同鄉會就做得好好。至於其他菜式，好似臭豆腐咁，亦一樣食到老饕豎起拇指。
睇上去好後生嘅方太已經有個讀緊中四嘅囝囝，佢話寧波人普遍都有靚皮膚，又感謝父母遺傳啲好嘢畀佢。
方太遲啲諗住開個人畫展，原來佢讀美術出身，之後轉讀室內設計，多年嚟都係企喺客人嘅角度出發，所以佢想用三年時間發揮小宇宙，畫啲自己想畫嘅嘢。