本文重點
熱浪侵襲各地，北京曾經試過四十度高溫，呢兩日雖然好啲，但香港中華廠商會成員訪問北京，卻要人人一襲正裝見人。天氣咁熱，着衫真係一件都嫌多，點算呀？隨團嘅廠商會立法會議員林大輝就話，佢哋有妙法，仲建議將呢個「除呔大法」引進嚟香港。
行程緊湊冇乜機會玩
廠商會訪京團尋日繼續第三日行程，副團長大輝話，今次行程緊湊，冇乜機會去玩。講到天氣咁熱，佢讚賞京官處事好有彈性，仲透露呢兩日佢哋分別同中央統戰部等多個部委食飯，就算領導人喺會晤時幾咁正經都好，到咗食飯時卻係另一個樣。
大輝話，一眾男士們一坐到餐枱前，唔使討論，大家打個眼色，就一個二個開始除呔，場面勁搞笑。佢認為天氣濕熱嘅香港可以大力推廣，事關環保啲嘛！