本文重點
特區政府回歸後好多改革，衙門名稱變完又變，○七年第三屆特區政府成立後，又將司局級架構作過一次大調整，變成依家嘅三司十二局。不過，三年過去，官場同市民至今都係搞唔清，快將退休嘅商務及經濟發展局常任秘書長蔡瑩璧（Yvonne）尋日就喺立法會現場示範，兩次將「政制及內地事務局」講錯做「內地及政制事務局」，令人啼笑皆非。
年尾退休離開官場
立法會工商事務委員會尋日開會，Yvonne出席匯報港台經貿合作平台最新工作情況，雖然貴為D8級高官，又做過新聞處處長，但Yvonne都搞唔清新架構嘅名，竟然將過去半年因為政改大計曝光到爛、甚至早前先同佢一齊去台灣訪問嘅政制及內地事務局局長林瑞麟嘅官銜噏錯，真係令人詫異。
由此亦可見，本屆管治班子推行架構重組咁耐，連官場嘅人都搞唔清，年尾就會退休前休假嘅Yvonne快將離開官場，記唔記得官場架構已經唔多重要，但政府都要認真對待呢個問題，事關早前專業會議議員梁美芬提出緊急質詢時，就將食物及衞生局寫錯做其前身衞生及福利局，官員、議員都搞唔清楚，一般小市民咪更加困難！