本文重點
金管局尋日會同三間發鈔銀行公布發行新銀紙，一眾銀行大班出席推介，可以為新銀紙簽名係銀行大班引以為傲嘅事，滙豐銀行亞太區行政總裁王冬勝（Peter）更加夠晒威，先後喺兩間發鈔銀行工作，任期又撞上新銀紙發行，結果，有佢簽名嘅渣打同埋滙豐銀紙周街都係。
曾任渣打大中華區主席
Peter尋日出席嗰個儀式時，都主動提起件事，話好榮幸可以唔止一次喺銀紙上簽名。睇番本港發鈔史，Peter任渣打大中華區主席時，已經為○三年版本渣打銀紙簽名，依家呢款銀紙依然流通緊。
滙豐○三年推出新銀紙，佢喺○五年過檔滙豐，所以加印嘅滙豐○三年版本新銀紙亦全部由佢簽署。唔講唔知，滙豐發行嘅銀紙一向由香港嘅執董簽名，Peter今年二月升任亞太區行政總裁，點解新銀紙依然由佢簽呢？皆因新版式樣喺今年一月一號拍板，當時Peter仍然係執董囉。