十大榜社民連三子包尾

長毛嘅競選開支申報顯示，因為補選期內嘅拉票活動，佢要交一千六百蚊交通違規罰款，唔知係衰衝燈定超速。長毛解釋補選時最緊要拉票，好多時泊低架車就趕住去做嘢，言下之意即係為咗選票，吞牛肉乾都冇辦法啦！佢仲話，泊車費加埋違泊罰款用咗萬零蚊「差唔多喎！」

記得516當日，長毛坐住架黑色開篷戰車穿梭選區，不時見佢個頭伸出車頂嗌咪。長毛作風激進，不時專登挑戰規矩，今次食咁多張牛肉乾，唔通佢連交通規例都睇唔過眼？

講番議會工作，立法會啱啱打完政改同最低工資幾場大仗，市民對政黨同議員嘅表現都好留意。最新一期港大民調就發現，喺政改一役被社民連狂炳嘅白鴿黨成為民望大贏家，主席鐵頭仁嘅評分急升四分達五十五點二分，副主席劉慧卿亦增加三點五分達五十四點三分，喺十大榜排名第三同第五，其他白鴿黨成員如張文光、李永達嘅評分都升咗一點五同一點四分；十大榜嘅首次席則係公文袋副主席梁家傑同黨魁余若薇。

同樣參加五區補選，但社民連三子就成為大輸家，評分更係低處未算低，喺十大榜排第十位嘅長毛只得二十六點五分，較對上一次調查、即今年一月中（五名立法會議員一月辭職，四月調查冇其紀錄），下跌六點三分；而排第九位嘅黃毓民，評分更下跌七點三分，僅有二十八分；大舊評分亦只有三十三點六分，減少近五分。