東區亞公岩道同柴灣道交界地底前日凌晨又有食水管爆裂，附近大廈超過三千戶居民即時斷水。其實，本港地底水管長期「超齡」運作，周不時呢度爆嗰度爆，整多一兩劑唔算新聞。奇就奇在，水務署搶修仲慢過龜爬，「搶」足三十四個鐘至搞掂。

叮！三十幾度高溫，屋企好似蒸籠咁，沖涼、洗衫、煮飯，冇水樣樣做唔到，水務署維修居然歎晒慢板，你急佢唔急，要居民捱足一日半冇水用，焗住出街食飯，去親戚屋企沖涼，用街邊消防喉洗衫，直頭係靠害。雖然署方安排水車到場，但受影響嘅好多都係長者，自己行動不便，仲要挽住桶水上落，真係慘不忍睹。

有東區區議員要求水務署盡快更換老化嘅水管。亦有區議員批評署方搶修時間太長，令人無法接受。太一叮有啲好奇，如果呢次係禮賓府或者乜司長官邸附近爆水管，使唔使幾十粒鐘至搶修完？又使唔使要班高官親自挽隻膠桶去水車接水呢？

講開又講，家陣啲水管東邊爆完西邊爆，大街爆完小巷爆，早已成「香港奇景」，連羅馬噴泉都要企埋一邊。舊年灣仔告士打道一條廿幾年歷史嘅鹹水管早上繁忙時間突然爆裂，引發地陷同水浸，造成灣仔、金鐘一帶交通大癱瘓。講番近啲，南區香港仔大道上個禮拜又爆一單，已經係一年內第五次。事發時連行人路都浸埋，商戶更埋怨「爆水管沖走晒啲客」。

水務署署長馬利德舊年曾經承認，本港喉管滲漏率較高，每年因水管老化爆裂及滲漏浪費嘅食水超過二億立方米，佔總供水量兩成二。換算成銀両，即係每年有七億元流咗入鹹水海。

納稅人血汗錢咁嘥法，快快諗辦法更換水管，堵塞漏洞啦。點知官員唔化，比水管老化仲恐怖。告士打道爆水管之後，水務署高官居然話考慮到有關工程對交通影響等因素，唔會加快更換水管進度喎。

叮！即係點先？每年幾億公帑唔知漏咗去邊，幾百萬市民隨時面對爆水管帶嚟嘅不便同困擾，你班高官仲翹埋雙手繼續歎慢板。水務署成日呼籲市民「節約用水」，原來係口是心非做大戲。管理水嘅部門變咗「浪費大戶」，你話係咪搞笑吖！

水署冇鬼用，市民冇水用。計太一叮話齋，既然高官唔使好似市民咁隨時面對斷水威脅，不如裝盆凍水由頭淋到落腳自己清醒吓，咪燒壞個腦，繼續亂Fing納稅人血汗錢啦。叮！