葉劉喺會慶乘機向傳媒介紹幾位新徒弟，喺活動最後嘅切蛋糕環節，扮嘢文自爆尋日係佢牛一，全場即時起哄，佢徇眾要求下向葉劉獻吻，仲足足錫咗四、五秒添。扮嘢文話自己一向關心香港發展，政改方案通過之後希望社會更加穩定，同時畀香港年輕人更多發展機會。

匯賢智庫新星學歷勁

扮嘢文又話好享受依家嘅生活，但仲有好多嘢想做，雖然自己得二十四歲，但就唔打算從政喎。咦？二十四歲？咁咪仲後生過年年二十五歲嘅譚詠麟？

講番尋日幾位新星，佢哋貫徹匯賢智庫吸納尖子嘅政策，讀書成績都十分好。其中負責頂替特首辦特別助理陳岳鵬喺智庫政策發展總監職位嘅，係牛津大學碩士姚振鴻，而另外兩位新星施俊輝同劉絜文就分別喺會考得到十優同七優。葉劉不斷吸納優質新血，唔知出年區議會匯賢智庫可以搶到幾多個議席呢？