二○一二年立法會選舉，各個政黨都吼實被喻為「超級議席」嘅五個新增區議會功能界別議席。政制及內地事務局局長「林公公」林瑞麟尋日表態，從法律角度，為令五個超級議席符合功能界別定義，政府傾向維持原有立場，規限由現任民選區議員提名同參選。
林公公話，由於五個超級議席面對三百萬名選民，所以有必要將選舉經費上限增加至大過分區直選，間接默認政府對議席嘅選舉模式亦有取態，就係以全港一個大選區進行嘞。佢仲話會諮詢各界意見，秋季先至有具體建議喎！不過，政府已有取態，睇怕都幾難翻案囉。
超級議席參選資格從緊，即刻有人發愁。白鴿黨、富貴黨同工聯會都曾要求擴大參選資格至前任區議員，咁啱三黨當前最有機會落場競逐嘅重量級人物，都掛住前區議員排頭喎，好似白鴿黨副主席單仲偕做過葵青區議會主席、富貴黨前主席田北俊曾喺山頂選區勝出，同埋工聯會陳婉嫻做過東區區議員。
若林公公講嘅已係定案，嫻姐三人須先喺明年區選勝出，先有資格爭超級議席。俗語有云「氹仔浸蛟龍」，政治明星敗走區議會屢見不鮮，白鴿黨李華明就領教過，嫻姐三人要跨過呢個心理關口殊不容易，而且對明年十一月區選，各黨布陣已幾近尾聲，三人係咪落場，短期內就要作抉擇，以便變陣，今次真係頭痕囉！
白鴿黨主席鐵頭仁話，林公公咁講唔代表政府關上商討大門。大家又睇吓結果係咪好似政改談判咁峰迴路轉？