話說呢排功夫熱再起，以功夫為題材嘅電影賣個滿堂紅，鬍鬚曾又再吼準機會重施故技，尋日佢喺個人網誌度話七月初趁到佛山市了解港商喺當地投資情況，參觀咗兩位廣東武術宗師嘅紀念場所，一個係黃飛鴻，另一個就係葉問。

又想叨李小龍光

佢講過Ｎ咁多次自小習洪拳，仲驚死人哋唔記得，喺網誌度又再提佢師傅係鄺鐵夫，師傅嘅師傅係林祖師公，而師公嘅師傅就係佢親叔叔林世榮，亦即係黃飛鴻嘅徒弟「豬肉榮」嘞，咁擺明話佢都係黃飛鴻嘅徒孫，認真唔知醜！

拉完一輪關係之後，又畀佢扯上另一個關係，仲特別提及葉問最有名嘅弟子係李小龍添！

講到呢度，相信大家都知道佢想做乜啦！事關李小龍今年係七十冥壽，佢特登摷番呢啲嘢出嚟講，分明又係叨光啫！咁政府為李小龍呢位國際巨星做過乜嘢？搞咗咁耐，李小龍館先有啲眉目，仲未知幾時可以搞掂，鬍鬚曾與其做呢啲小動作，不如做多啲實務好過啦！