專業會議嘅立法會議員梁美芬平時畀人好理性嘅感覺，事關佢喺大學教法律，對時勢又計得好精準，識得用捉老鼠上位，但其實佢都有感性嘅一面，早前見佢喺雪廠街一間西班牙餐廳食晏，原來佢至愛呢度嘅環境，歎美食之餘又可以令自己鬆弛一番喎！
當日佢叫咗必食嘅西班牙沙律，同埋香味四溢嘅西班牙海鮮飯，餐廳經理Billy見熟客又嚟幫襯，特別推介皮脆肉嫩嘅燒乳豬、墨汁墨魚等招牌菜式。梁美芬話幾年前朋友介紹佢嚟呢度食嘢，從此就成為佢嘅私人飯堂。
梁美芬曾經喺巴黎留學，歐洲食物好啱佢胃口，而呢度有大玻璃，環境一流，尤其喺輕快音樂伴奏下，食嘢零舍好味道，又可以洗滌心靈。佢愈講愈詩意，話望吓窗外充滿生氣嘅中環街景，辛勞苦悶都可以一掃而空！所以有時佢會喺度寫書，笑謂有事半功倍之效！