相信大家仲記得，上個月二十四號立法會如火如荼咁審議政改方案，為防止高鐵撥款事件重演，警方小題大做，喺立法會大樓外布防，防止「80後」青年乘機發難衝入立法會大樓，點知有啲人就可以施施然咁行入去。

大輝憶述被困慘況

話說當日幾十個菜園村村民約好運輸及房屋局副局長邱誠武喺灣仔修頓中心開會，商討申請復耕牌照事宜，仲請埋白鴿黨「高達」李永達出席。點知高達話要開立法會，提議不如改喺立法會開，咁就弊嘞，班村民下晝三點幾殺到立法會，唔見邱誠武，於是發難，坐晒喺地下抗議，阻礙通道，仲嗌埋口號，擾攘到夜晚八點幾先至肯離開，足足玩咗五粒鐘，唔知仲以為立法會又起高鐵撥款爭拗。

立法會廠商會代表林大輝喺新一期通訊憶述，當日接獲保安通知，叫佢留喺房間以策安全，要到「新界王」劉皇發勸走班村民，佢先至重獲自由，認真陰公。立法會因為傾政改，門外門內氣氛已經好緊張，點知高達唔醒目，幾乎點起另一個惹火嘅題目，搞到立法會大樓內外都火燒咁。

呢啲嘢真係唔講得笑，立法會秘書處為免大樓再被示威者佔據，早幾日突然出招，向全體立法會議員發通告，講解公眾進入立法會大樓同中區政府合署議員辦事處嘅新安排。由即日開始，立法會議員若要喺立法會會見市民，唔該事先通知秘書處，方便保安核實訪客身份。如果唔能夠事先通知，秘書處有可能會聯絡負責嘅議員核實訪客身份。

至於中區政府合署嘅新安排同立法會大樓大同小異，管理處方面特別指明要議員注意，安排公眾到訪嘅議員需要負責埋訪客喺政府合署裏面嘅行為，一句講晒，就係閒人免進。議員會見市民嘅新規定影響全體議員，高達都算累街坊囉！