出生時只有半邊肺的蔡文茵，因兩度受肺炎感染，性命危在旦夕。昨日有關報道刊登後，大批讀者致電捐款及慰問，頻撲多個月的蔡生蔡太終於可以鬆一口氣：「原本仲係好徬徨，日日都提心吊膽，驚唔知幾時可以為茵茵做手術，今日個心先至可以定下來！」

對於讀者的支持，蔡太感動得眼紅紅，「好多謝讀者嘅關心，我哋全家人都好感激，估唔到香港有咁多人咁有愛心，即使小小支持，已畀到我哋一家人好大鼓舞！」她昨日剛探過茵茵，發現女兒面部被呼吸機器的喉管壓得紅紅腫腫，但仍是眼仔碌碌「周圍望」，表現得十分活躍，心痛之餘亦甚感安慰。

「佢都唔放棄自己」

蔡太憶述，看着茵茵兩度感染肺炎徘徊在生死邊緣時深感自責，不忍看見女兒受病魔及藥物折磨，曾想過放棄。「唔係佢一次又一次好番，我哋都支持唔到落去，佢都唔放棄自己，我哋更加唔可以放棄佢！」

然而即使手術成功，每兩個月仍要赴台覆診一次，蔡太擔心併發症需動手術又再花費，觀察兩年若情況好轉才可取出支架。「雖然手術有風險，仲可能負擔好重，但點都要試一試，如果好彩成功嘅話，醫生話茵茵可以好似正常人咁成長，就係我哋最大嘅心願。」

茵茵主診醫生、廣華醫院兒科顧問醫生吳國強表示，茵茵目前情況尚算穩定，肺炎已痊愈，若決定做手術，現在是最佳時機，因無法預知其病情變化，形容茵茵現有如「踩鋼線」，「做手術唔擔保醫得好，但唔做又再傷風感冒，可能會呼吸衰竭，佢已經試過兩次，都救得番，但第三次呢？」

四小時送到台醫院

吳稱，茵茵所患的先天性單邊肺部發育不全綜合症，正名為「彎刀綜合症」（scimitar syndrome），因右肺發育不全令左氣管被扯向右邊，使左氣管進一步扭曲收窄，若動手術將金屬支架置入左氣管，可令氣道暢順。

若落實將茵茵送往台北做手術，由於全程需以呼吸機或氧氣罩協助呼吸，飛機上氣壓亦較地面低，故事前需與航空公司商討細節，將行程縮至最短，「由廣華醫院去機場約一個鐘，清關、上機嗰啲盡量縮短，坐飛機去台灣大約一個半鐘，落機後再用一個鐘去台北市榮民總醫院，總共約四個鐘，茵茵應該支持到。」他指會與醫管局總部商討，安排醫護人員以義工形式與蔡家同行，出發前會先為茵茵麻醉，以免她在機上掙扎影響呼吸。