惡導遊辱罵內地旅客，一罵成名，贏得「母夜叉」、「土匪」稱號，簡直紅遍大江南北。正如旅發局主席田北俊話齋，今次事件影衰晒香港人，佢話喎，如果旅遊業議會「管唔掂」，應該由港府發牌規管導遊，如果唔係，旅發局使幾多錢做宣傳推廣，講到天花龍鳳，都冇人會信喇。

其實旅議會管唔掂，係人都知，本報曾經多次指出，與旅遊業相關嘅機構多籮籮，但係最重要嘅監管工作竟然交由業界嘅旅議會負責，就好似踢波咁，旅議會又係球員又係球證，自己人管自己人，點可能管得掂呀！

聽吓業界人士點講啦，有位旅遊巴司機踢爆，今次事件不過係冰山一角，其實平均每十個團就有三、四個會發生導遊鬧旅客事件。

話時話，不良業者同黑店聯手劏客，經常同團友發生爭執，已經係公開嘅秘密，你知我知，當局當然唔會唔知，只不過側側膊詐唔知，因為唔知就唔使做嘢吖嘛，叮！

好笑嘅係，當局平時唔做嘢，每次出事後就滾水淥腳咁，急急出嚟做騷補鑊。其實，正如田少話齋，既然旅議會管唔掂，點解政府自己唔負起監管責任呢？早知燈係火，唔使周圍摸，如果當局平時做好監管，就唔使次次都要亡羊補牢咁狼狽啦！

近年，當局大力推廣所謂「誠信遊」，點知到依家都只係佔內地團嘅一成半，簡直係笑話。一句講晒，無論係賊過興兵，定係誠信遊，都係治標唔治本，真正治本嘅方法，就係由港府設立一個專責嘅監管部門，統一管理旅遊事務。仲有吖，對於屢禁不絕嘅黑店，當局更加要諗辦法解決，否則，你有你發牌，佢有佢劏客，到頭來咪又係嘥氣。

旅議會為咗補鑊，聲稱要求人大代表向內地反映業界苦況，堵截內地旅行社以低於成本價接團喎。其實講到尾，劏客、趕客醜聞始終係香港搞出嚟嘅，如果當局繼續廢廢地，乜都唔做，莫講話向阿爺求救，向個天求救都無用喇！