政壇、商界到處都有「80後」嘅蹤影，國家方面，亦有雲集青年才俊嘅全國青年聯會，目前港區兩位全國青年聯會副主席係黃英豪同曾智雄，佢哋今年就卸任，勢引爆接任人嘅激烈競爭，據講唔少香港青聯成員同富豪後代都覬覦呢兩個位，但就以香港青聯主席陳仲尼（Rock）同近年崛起嘅菁英會創會主席、百仁基金新鮮出爐主席施榮忻係大熱門。
全國青聯隸屬共青團，係港人踏足內地政壇嘅跳板，按傳統，全國青聯主席必然由共青團領導擔任，副主席中香港有兩個名額，多年嚟為嫡系香港青聯嘅囊中物，好似港區全國人大代表霍震寰、王敏剛，同家吓嘅黃英豪及曾智雄咁。慣例喺每年八月，全國青聯都會去北京開會，但接替黃英豪同曾智雄嘅最終人選仲未有聲氣。
據悉有富豪後代力爭全國青聯副主席呢個位，香港青聯內部仲傳出，有人願意分五期捐出一千萬元，支持發展香港青年嘅工作，出手咁豪，真係非一般人可以負擔。有消息指，中央有關部門早前曾就全國青聯副主席兩個港區名額問題，向幾位香港青聯元老徵詢意見，元老們全部企硬撐番青聯人，但係全國青聯至今仍未能拍板，爭持有幾激烈可想而知。