立法會休會在即，議員都唔肯放過發展局局長林鄭月娥，誓要的佢去立法會質詢吓冧樹意外嘅補救措施，林鄭雖然好打得，但前上司、即做過保安局局長嘅匯賢智庫立法會議員葉劉淑儀就一啲都唔畀面，仲揶揄樹木辦嘅人好似流水官咁，轉過頭就去金融管理局「搵真銀」。林鄭一聽，即刻語帶刺咁暗寸葉劉嘅說話唔夠愛護後輩。
唔同時期嘅兩個官場「打」女過招，焦點係政務官（AO）嘅去向。葉劉喺立法會辯論冧樹問題時，質疑林鄭旗下一名政務官去咗樹木辦冇耐，就跳槽去金管局搵真銀。葉劉本來係質疑樹木辦官如流水，點跟到危險樹木嘅問題，點知林鄭一接招就澄清，呢位政務官去金管局都係服務市民，佢亦唔會用搵真銀嚟形容呢位前下屬。
跟住林鄭又岔開話題，話自己喺政府期間，曾經跟過葉劉兩年，並以尊重嘅口脗話：「我喺葉太身上學到最好嘅嘢，就係愛護啲政務官後輩！」咁講，即暗寸葉劉唔夠愛護政務官後輩啫！兩太交鋒，彼此都佔唔到便宜，但就為AO提供咗點唇槍舌劍嘅案例，學嘢喇！