本文重點
立法會一連四日開會，第三日更要踩通宵審議《最低工資條例草案》，創下連續開會二十九粒半鐘嘅紀錄。議會攻防不斷，各黨各派都要留守足夠人腳喺議會，最慘係前晚十一點打後至翌日凌晨三、四點嗰段時間，好多議員呵欠連連，甚至喺前廳（議員休息室）瞓到打鼻鼾。
甘威帶定嘢沖涼
禮拜六凌晨，當備受爭議嘅最低工資水平「每年一檢」修訂被否決後，議事廳戰事暫告一段落，一眾議員立即爭取時間去前廳休息，中總代表黃宜弘更喺梳化上倒頭大睡；保險界嘅陳健波話曾經同部分同僚去茶餐廳食消夜，補充體力；建仔嘅陳克勤則喺凌晨時分返屋企沐浴更衣；白鴿仔甘乃威就帶備個人清潔用品去立法會沖涼。
公文袋嘅余若薇話，成世人都未試過咁樣通宵開會；職工盟嘅李卓人就話自己雖然搏命放蚊，過去兩日亦只瞓咗唔夠一粒鐘，不過辯論時就鬥志高昂。內會主席劉健儀不時要幫主席撐場，自禮拜五朝早九點已冇瞓過覺。議會不眠不休運作，食嘅、用嘅產生唔少垃圾，尋日散會後，工作人員共收集咗十幾袋垃圾。