書展下禮拜開鑼，唔少人都趕在呢個檔期出書，DHL亞太區創辦人鍾普洋（Po）尋日都來湊熱鬧，搶閘推出新著作《落力退休》。阿Po事業有成，退咗休十幾年，對退休生活嘅心理、心態都領略得好深，所以先寫咗呢本關於退休嘅書。佢仲話，想老年生活有創意，就要好好設計退休生活模式。
佢嘅新書發布會喺灣仔天地圖書舉行，城中重量級商界好友現身撐場，譬如德昌電機集團主席汪穗中、利豐集團主席馮國經、前財爺百仕通集團大中華區主席梁錦松、行會成員梁智鴻同查史美倫、前廉政專員羅范椒芬、前貿易發展局總裁施祖祥、眾人媽打李麗娟、前警隊一哥李明逵等。
現年六十七歲嘅阿Po講笑咁話，好開心有個咁活躍嘅老婆Helen，令佢覺得自己仍然好後生。佢本《落力退休》分八個章節，當中提及享受退休嘅六大心法，其一係「孤獨求靜」，進行靜修、靜坐及冥想；另一心法係「撈走電鰻」，指生命如一個大魚缸，電鰻代表人嘅心結，有時會被電鰻電親，所以要撈走。