呢次體驗職業司機苦況之旅係由立法會方面提出，邱騰華雖然明知畀人擺上枱，但都冇得say no，雙方協調之後，揀咗二十六號中午一點去一啲巴士、小巴或的士站頭。按照傳統節氣，大暑日即二十三號係一年最熱嗰日，邱騰華落區嗰日應該都係全年最曬、最熱嗰幾日之一。

變招唔領Miriam情

日前，Miriam主動詢問環境局使唔使安排定幾架車，畀邱騰華到時落區感受吓？據講邱騰華耍手擰頭，一陣話落到區先徵用車輛，結果畀人潤佢：「拍戲咩？到時啲司機大佬要開工，邊個理你呀？」跟住，邱騰華又變招，寧願搵運輸署安排車輛，都唔領Miriam嘅情。到底佢係驚業界大整蠱吖，定係驚Miriam專登搵架超級熱狗蒸熟佢呢？

其實，邱騰華方面至今都未講明當日落區會唔會坐上熱狗乾蒸，環境局方面只話，邱騰華當日最多去五個點，每個點最多留二十分鐘。即係話，每去一個地點，扣除雙方握手、寒暄，講吓意見嘅時間，剩低畀邱騰華感受熱狗嘅時間可能唔超過十分鐘，咁短時間，點體驗得到司機大佬乾蒸嘅滋味呢？難怪Miriam聽到佢哋嘅回覆時，都忍唔住窒句：「唔係又想用目視法搞掂呀嘛？」