呢段精彩短片經過內地十幾個電視台轉播後，女主角阿珍風頭一時無兩，迅速「惡」遍大江南北。有內地電視主持甚至將佢形容為「母夜叉」、「土匪」添！

唉，香港自稱係乜嘢好客之都、動感之都，仲話要成為乜嘢亞太旅遊中心，但係三頭兩日就傳出趕客醜聞，真係唔慌唔好「嚇」喇。五月發生過「激死旅客」事件，早前又有河南團友懷疑因拒絕購物而被遺棄機場，呢啲醜聞仲未處理，今次又爆出女導遊辱罵團友，真係一醜未平一醜又起，香港想唔臭名遠揚都難咯。

事件曝光後，當局例牌賊過興兵。旅遊事務專員話並冇接到旅客投訴，但就好關注事件喎。而旅遊業議會就強調今次係「個別事件」，會查處相關導遊咁話。

叮，旅遊事務署係主責旅遊事務嘅政府部門，業界出咗咁多事，佢哋唔主動調查，仲話要等人哋嚟投訴，簡直豈有此理。再講喇，一次係咁，兩次係咁，次次都話係「個別事件」，細路仔都唔信喇。

其實，當局對旅遊業嘅監管不嬲七國咁亂，部門各自為政，十足一盤散沙咁。旅遊事務署係政府部門，但只負責旅遊設施同政策；旅發局係公營機構，但只負責宣傳推廣；反而屬於業界自律組織嘅旅遊業議會就負責監管，可惜無職又無權，管鬼咩！

正如消委會話齋，旅行社不良營商手法係行業嘅結構性問題，需要用行政手段監管先至可以解決。其實，各界一早就建議當局成立一個機構，統籌管理旅遊業，可惜成班官員都係「廢廢地」，左耳入右耳出，根本唔當回事。當局成日都話旅遊業係經濟支柱，既然咁重要，點解坐視不理？點解唔加強監管？叮！

港府條條Fing，對旅遊業唔監唔管，直情係玩死香港。正如內地網民話齋，「旅遊去邊度唔得呀，一定要去香港咩？」家陣周邊地區旅遊業興旺發達，內地人旅行唔驚冇地方去，以新加坡為例，近年大力開發旅遊設施，尤其係環球影城年初開幕後，吸引大量旅客，唔止旅遊業受惠，仲帶起整體經濟，唔怪得第二季經濟增長接近兩成。反觀本港，一味製造醜聞趕客，想唔死都幾難！