本文重點
本港旅遊業近期負面新聞多多，導遊更成為關鍵人物，喺康泰旅行社由初級文員做到總經理嘅劉美詩（Susanna）尋日自爆當年進身旅行社嘅經歷，話初出道帶團嘅時候曾經畀男團友用粗口鬧到喊，差啲想辭職，好彩自己對旅遊業有團火，先喺行內捱咗三十二年。
三個月就升做領隊
仲有半個零月就放榜，Susanna尋日出席香港青年協會一個活動時，分享佢由中五畢業後進身高職嘅成功秘笈，佢話自己中五畢業後入行，初頭三個月咩都要做，出街送信、去航空公司出機票、拎住大疊護照去領事館搞簽證、影印填表，通通做過。佢爭取學習機會，不時向前輩偷師，三個月就畀佢升做領隊。
Susanna好自豪咁話，第一次帶四十幾人去泰國玩足七日，因為事前工夫做到足，無一個客發現佢係新丁兼第一次出埠。不過第二次再去曼谷，適逢當地搞亞運會，到埗首日就發現有五、六間房攞唔到，惟有問有冇家庭肯屈蛇一晚，結果有個男團友用粗口鬧佢，佢忍淚冷靜處理，最後剩番八個人去第二間酒店暫住一晚。