香港青年協會尋日搞咗個青年領袖論壇，邀請一班金融業同商界名人同近千學生對談，紀勤係唯一一個喺論壇發表專題演講嘅嘉賓，來港短短幾個月，佢嘅演詞已一矢中的，佢話時下青年人應做好「改變」嘅準備，佢發現本港好多年輕人寧願選擇留喺屋企（tend to stay at home），都唔肯去外地工作同見識，寄語港青要有國際視野，有信心應對挑戰，咁先可以帶領香港向內地同世界進發。佢仲以自己為例，話當初入滙豐時未有學位，但佢從來冇失去信心，亦冇睇小自己。

錢果豐都有同感

有份出席嘅港鐵主席錢果豐亦有同感，話舊年一班港鐵新入職嘅年輕人被安排去瑞典工作，當地冬天日短夜長，可以話「不見天日」，但班年輕同事適應力強，工作亦做得頭頭是道，令佢好欣慰。借呢批年輕人鼓勵時下青年，讀書叻之外仲要適應力強，最重要仲係肯衝出香港。