立法會本立法年度嘅工作就嚟完結，辛勞一年嘅代價就係有燒豬食！點解？因為一眾立法會議員有感秘書處同保安員過去一年做嘢太辛苦，尋日夾錢買咗兩隻大燒豬請立法會職員食，聊表心意。
切燒豬儀式由內會主席劉健儀（Miriam）同立法會秘書長吳文華（Pauline）主持，Miriam話今次係第一次立法會議員一齊請秘書處食嘢，有四十幾個議員夾錢，每人夾咗二百幾蚊，不過就唔肯透露邊啲人冇夾錢。Pauline就代表秘書處好多謝大家嘅關心，話會將燒豬分畀唔同辦事處嘅職員，不過成個秘書處夾埋成四百幾人，兩隻燒豬好可能唔夠分噃！
睇番今年嘅會議，馬拉松會特別多，好似一月嘅高鐵撥款、六月嘅政改方案，仲有呢幾日審議緊嘅最低工資，全部都開幾日會先傾得完，加上依家議會內外保安工作愈嚟愈繁重，議員表達心意都好應該。勞工及福利局局長張建宗同「鼠王芬」梁美芬尋日都掏荷包請食水果，為沉悶嘅會議帶嚟多少刺激。