「最美麗港姐」朱玲玲已變身攝影界名人，前日佢喺中環置地廣場畢打街出現，只見佢一襲性感小背心及黑裙，挽住常用嘅LV Monogram Multicolore手袋，唔似出街影相，佢話嚟中環搵一位「拍友」傾偈，點解老公冇陪伴身邊呢？朱玲玲雙眼瞇成一線話：「佢好忙呀！」
前日下晝四點半，朱玲玲喺畢打街門外的士站左望右望，似係等緊司機嚟接佢，唔知係咪當時已經接近放工時間，中環好塞車，司機遲遲未到，朱玲玲只好漫無目的咁逛吓附近嘅商舖櫥窗打發時間，直到電話響起，先稍移玉步到附近酒店上車。
問及三個囝囝嘅近況，朱玲玲話佢哋各有各忙，只係偶爾聚埋一齊食餐飯，一齊旅行就無時間嘞。至於大仔啟剛幾時同「跳水公主」郭晶晶拉埋天窗，朱玲玲好肯定咁話：「未有咁快！」