本文重點
本港四大商會之一嘅中華總商會，喺中環嘅中總大廈已經有逾五十年歷史，早前中總上下集資逾千萬元翻新，尋日舉行新貌開幕禮。中總會長蔡冠深變身導遊，仲特登帶嘉賓參觀新設嘅「袖珍版人民大會堂接待廳」，呢度嘅特色係將人民大會堂接待廳照搬過嚟，地方雖然冇咁大，但格局有九成相似。
曾憲梓讚蔡會長膽識夠
裝修咗八個月嘅中總大廈吸引逾二百位政商界名人嚟八卦吓，地下大堂、五樓接待廳同八樓大禮堂已煥然一新，布置以閃爍金色為主調。蔡會長話，五樓逾四千呎接待廳嘅天花板，全部鋪上金箔，因為金色寓意發財，希望商會會員個個賺到笑。
中總榮譽會長曾憲梓都有出席，佢一邊睇一邊露出滿意嘅笑容，仲當眾大讚蔡會長膽識夠，實事求是，將中總搞得有聲有色喎。貴為「福布斯」富豪嘅蔡冠深，為中總出錢又出力，自掏腰包捐出五百萬元贊助大廈翻新。副會長楊釗捐咗二百五十萬元、榮譽會長霍震寰同張永珍分別捐出二百萬元、金利來太子爺曾智明及「新金王」黃英豪各捐一百萬元、副會長方文雄、張成雄及李德麟就各捐五十萬元。