本文重點
有李漢奸之稱嘅白鴿黨創黨主席李柱銘年初聯同壹傳媒集團主席黎智英等，舉行咗個「搞事四人幫」密室飯局，企圖逼白鴿黨參與五區總辭，為「變相公投」造勢，其後被白鴿黨元老司徒華踢爆事敗。參與補選落敗嘅「大專2012」成員黃永志近日向選舉事務處提交選舉開支報告，揭發李漢奸原來捐咗三十萬蚊畀「大專2012」五個候選人參選，五人均分後每人有六萬蚊。呢次李漢奸想唔認出錢出力推動「變相公投」都唔得啦！
話無其他意圖搵鬼信
「大專2012」五名成員參加五區補選時，曾被人指為疑似社民連「B隊」，催谷選情。我哋翻查九龍西候選人黃永志嘅選舉開支申報，赫然發現李漢奸有份財政資助「大專2012」候選人參選。黃永志選舉開支總共用咗十三萬六千蚊，而籌得捐款約十三萬蚊，其中以李漢奸嗰六萬蚊最大份，佔咗一半。三十萬蚊話少唔少，等如一個普通清潔工嘅幾年人工，李漢奸咁大手筆支持「大專2012」參加補選，話無其他意圖，真係搵鬼信！