17/07/2010

播放本新聞相關短片

政情:立會踩通頂玩殘張建宗

立法會一連三日辯論最低工資草案,單一議題辯咗超過三十個鐘,搞到一眾議員同勞工及福利局局長張建宗都殘晒,「立法會」好似變咗「立謝會」(個個立即謝晒)。由於大會休會在即,聽日主席又要應邀外訪,議會被迫焗踩通宵,完成本立法年度最後一日議程。長命會最考體力同腦力,偏偏張建宗又冇副局長幫手,全程只能單打獨鬥,甚至食飯都唔敢行開,最低工資草案變成最高體力挑戰,第一個玩謝嘅肯定係張建宗。

議員提醒注意職安健

審議草案尋日進入第三日,好多修訂案都被一一否決,立法會嘅氣氛亦由日前嘅緊張變成疲累,議員有六十個,只要唔少過法定人數,就可以行出行入、甚至小休一陣,但張建宗得一個人,惟有好似老僧入定咁死守。日前職工盟嘅李卓人已經留意到佢一直坐喺議事廳,冇去食飯,提醒佢注意職業安全健康。尋日,張建宗又唔肯出去食晏,搞到立法會主席要破天荒宣布暫停會議二十分鐘,等佢去食飯。張建宗事後公開打趣話,感謝主席畀佢同議員有時間去食個「快餐」。

但肚空咗可以醫飽,腦實咗就未必有計,經過幾日攻防後,張建宗尋日回應提問已疲態盡露,連佢嘅支援人員都不能幸免,將佢揶揄唔同陣營勞工界議員會商意見嘅「武林大會」,寫為「舞林大會」;有議員私底下都話,個會好似無底深潭咁望唔到底。

其實今次立法會嘅長命會並唔係首次,○六年立法會審議《截取通訊條例》時都傾咗五日,當時仲有單搞笑事件,保安局局長李少光當年又係一夫當關,除咗人有三急,焗住去洗手間外都唔敢行開,點知有次行開三分鐘,就輪到佢發言,當時嘅立法會主席范徐麗泰搵佢唔到,惟有嗌停會議,仲笑光哥「自然的呼喚」。或者係咁,張建宗先選擇死撐,但表現欠佳嘅撐一樣冇分噃。