嗱，呢頭石硤尾大坑西邨揭發一宗長者夫婦死去多時冇人知嘅人倫悲劇，葵涌梨木樹邨尋日又有一名年過六旬嘅獨居男子被發現倒斃家中，估計已經死咗一至兩日，懷疑同失救有關。

叮！同類意外接二連三，表面睇可能同近排天氣持續酷熱有關，無獨有偶，死者都係冇人照顧，同外界好少接觸，亦即所謂嘅隱蔽戶。如果事前有人探訪，得到及時照顧，悲劇有可能避免。居然等到屍體發臭至被發現，你話係咪繁華都市之辱、香港之恥吖？

安老事務委員會主席梁智鴻指大坑西邨「妻跌死、夫餓死」事件，反映香港對隱蔽長者照顧不足，又話呢啲老人家除咗社福機構幫助之外，亦需要鄰里嘅照顧同關心。講真，鄰里互助關懷固然重要，但呢班長者更需要嘅係當局提供實質性協助，等佢哋有一個安全舒適嘅環境度過晚年。

但現實唔止令人失望，更令人絕望。早排有調查發現，受訪者有近三成承認自己係隱蔽長者，更得人驚嘅係，四成半到六成受訪者有情緒同長期病患，而且超過半數人話，即使遇到困難或者身體唔妥，都唔會主動搵人幫手。

據估計，全港隱蔽長者可能多達九萬人左右。如果有一半，即係四、五萬老人家都「費事麻煩人」，唔主動求助，而當局又繼續詐睇唔到，你話嘞，長者生無人問、死無人知嘅悲劇，有乜理由唔愈來愈多吖！

叮！繁華背後仲有咁多長者被遺忘，雖然當中可能有人因為環境關係變得孤僻，拒絕求助，但如果政府仲記得「老吾老以及人之老」係乜嘅話，就應該主動接觸呢啲公公婆婆，了解佢哋嘅真正需要，而唔係坐喺冷氣房等人上門。

當局承認，舊年喺輪候資助護養院、護理安老院宿位期間離世嘅長者，加埋共有四千幾人。講真，老人家要求嘅不過係老有所棲、老有所護，可以有尊嚴咁走完人生最後一程啫，當局居然連咁卑微嘅要求都唔提供足夠資源去滿足，搞到每年有幾千個公公婆婆抱憾離世。呢個政府仲縮骨到冇朋友，居然攞「居家安老為本，院舍照顧為後援」呢招嚟卸責。

叮佢個鎯鎯！當局一面撳住荷包唔放水，一面死撐話只要有足夠社區支援，長者可以留喺屋企安老。講白啲，即係話之你死。政府隱形，關愛變關人，結果咪就係失救冇人知，「居家安老」變「居家安息」，公公婆婆死都唔眼閉囉。叮！