傳統中國人唔鍾意「死無全屍」，好少人死後會捐贈器官，梁卓偉喺區議會會議上自爆簽咗器官捐贈卡，希望借呢個機會呼籲多啲市民一齊簽。佢又話自己唔食煙、少飲酒，死咗之後應該有好多器官都仲有用，例如五臟六腑同對眼都可以捐晒。佢仲唔怕忌諱，話自己條屍捐晒啲器官後應該都「冇咩剩」，但都會捐埋畀港大醫學院解剖，「解剖完應該都會變到溶溶爛爛㗎喇！」認真物盡其用，仲慳番一個公營或者私營龕位添！

其實梁卓偉同港大好有淵源，喺一九九九年至二○○八年期間，佢喺港大做公共衞生及社會醫學教授，計落差唔多有十年時間，唔怪得佢話死咗之後連條屍都會捐畀港大啦！