16/07/2010

播放本新聞相關短片

政情:搞搞政:梁君彥力撐夠班攞金章

經濟動力立法會議員林健鋒(Jeffrey)除咗係巴西足球擁躉外,原來對巴西經濟發展都好有信心,佢下月會出發到巴西考察,開發商機,順便周圍玩吓,見識吓擁有三屆世界盃榮譽嘅雷米金盃同宏偉嘅聖母像。

講開又講,Jeffrey今年無緣同親密戰友梁君彥(Andrew)一齊攞金紫荊星章,惹嚟外界揣測政府玩大細超。不過,Andrew尋日話今次獲頒金紫荊只關乎佢擔任職訓局主席,肯定職訓局團隊作出嘅貢獻。對於有人指今次奪金係由於佢同身為授勳委員會主席嘅政務司司長唐唐熟落有關,事關兩人喺工業總會時已認識,Andrew就回應話:「呢個就無法揣測到喇,但職訓局成績有目共睹,非政治性報酬。」

跟住有記者問起,Andrew喺任生產力促進局主席期間,該局曾爆出多宗醜聞,畀審計署公開批評噃!佢承認其任內確係有啲瑕疵,但亦為生產力促進局做咗好多改革,包括加強對中小企嘅服務喎!唔通授勳委員會只係睇眼前嘅嘢,考慮授勳名單係不計前嫌嘅?

為應屆會考生打打氣,請瀏覽on.cc《放榜無限分2010》專輯