內會主席劉健儀前排先大鬧政府，年年都拖到最後一刻至向立法會提交條例草案，搞到次次會期尾都要趕工，但政府就意見接受、態度照舊，今年仍然堅持喺最後一次大會至表決極具爭議性嘅《最低工資條例草案》，加上今次政府唔肯讓步，於是各議員合共提咗十幾項修訂，搞到二十幾粒鐘都未傾掂。

之但係搞到要通宵開會，絕對唔單單因為一條《最低工資條例草案》。近日唔少熱門話題政府都冇處理好，議員要臨時喺呢次大會嘅議程上加插議題討論，拖長開會時間。白鴿黨李永達要求運用《立法會（權力及特權）條例》，要政府向立法會提交所有有關天匯嘅來往信件，但建制派並唔想落政府面，一定會大力反對，冇三粒鐘都未必傾得完，加埋由匯賢智庫葉劉淑儀提出有關冧樹嘅休會辯論，搞到今次大會開極都唔完。

其實今次情況仲有啲特殊，因為立法會主席獲邀去中東交流七日，禮拜日下晝就要出發，所以會議一定要禮拜六完，問咗議員意見後，主席決定今晚起會通宵辯論直到完成所有議程，所以睇嚟班議員今晚注定喺立法會坐天光嘞！