講明做到二○一二年任期一完就退休嘅教育局局長孫明揚，尋日畀記者再三追問邊個會係接任人選，佢初時三緘其口，話自己唔係特首，冇權選賢入閣，但畀記者再追問多幾次後，佢彈出一句，讚手下副局長陳維安任內表現都做得「好標青」吖！
政府正就副局長同政治助理進行中期表現考核，斟酌調整薪酬。雖然外界有人讚過陳維安嘅表現都算好㗎喇，而且攞緊頂薪，早前佢返「娘家」馬會出席一個公開活動時，話做嘢最緊要開心，仲話希望可以做到任期結束，依家孫公咁講，係咪暗示陳維安唔會中途畀政府炒魷，亦唔驚中期表現考核後要減薪或凍薪，甚至有望加人工呢？但講到加人工，睇怕肯定畀班立法會議員鬧爆。