16/07/2010

播放本新聞相關短片

政情:蘇菲借糯米雞為陳十九伸冤

呢幾日立法會審議《最低工資立法條例草案》,大財團同功能界別繼續成為泛民主派嘅圍剿目標。被煲呔曾委任為臨時最低工資委員會成員嘅大家樂集團主席陳裕光,因為以時薪十九蚊聘請員工而被「冊封」為「陳十九」,畀外界破罵嘅程度不下於「廿蚊張」,但嚟自經濟動力嘅紡織及製衣界功能界別議員「蘇菲」梁劉柔芬,竟諗到辦法幫佢護航。

最低工資嘅辯論尋日繼續成為泛民同功能界別議員嘅戰場,蘇菲不滿有議員將所有責任同牢騷推晒去一班僱主度,講講吓就為陳裕光伸冤,事關覺得佢多年嚟做嘅嘢有好多人鍾意,唔應該畀人鬧到咁甘喎。

蘇菲舉例話最鍾意食大家樂嘅糯米雞,不斷形容整得「好正」,又大讚大家樂多年嚟喺陳裕光掌舵下,不斷改良食物質素,養活好多員工:「佢唔似金融業,佢冇請過外國人喎,又做咗咁多員工培訓,貢獻咁多,佢錯喺邊呢?」

查實無論陳裕光嘅糯米雞係咪咁正,用十九蚊請人就係鐵一般嘅事實,蘇菲以糯米雞呢個咁牽強嘅原因為陳十九開脫,唔只令人有多一個反抗功能界別嘅理由,更加凸顯佢冇內涵!

為應屆會考生打打氣,請瀏覽on.cc《放榜無限分2010》專輯