煲呔曾早幾日出席立法會答問大會時，相信大家都留意到佢前面唔係擺住本裝滿貓紙、幾吋厚嘅「快勞」，而係iPad。佢仲驚死冇人知咁，尋日特登喺個人網誌重提佢出席答問大會時冇再用貓紙，又自圓其說話自己對政府所有政策嘅重點一清二楚，但喺個別數據同細節就唔一定可以「脫口而出」。佢又話喺答問大會用「參考書」係務實之舉，可以為自己每一句說話負責。

佢繼續自吹自擂，話改用咗iPad之後，已經將開場發言稿同參考資料儲晒喺部機入面，佢好享受電子產品帶嚟嘅高效，令佢喺議事廳裏面同議員互動可以更加暢順。講到部機有咁好，唔知仲以為佢收咗廣告費幫iPad賣廣告添。坦白講，有時如果數據真係太多太亂，用一啲方法提醒自己的確無可厚非，但從佢以往嘅表現嚟睇，幾乎可以肯定佢唔只記唔住數據咁簡單。

一樣被窒到冇聲出

之前都提過啦，煲呔曾連喺公開活動嗌口號都要睇貓紙，今次佢改用電子產品，相信都只係為咗掩飾自己記性差。好可惜，從佢用iPad嘅手勢同動作就可以知道，佢根本唔熟部機，即使有靚機輔助，回答議員提問時始終唔見得特別流暢，最後咪一樣畀議員窒到冇聲出！

原本用iPad呢一類「潮機」，對形象應該係有加分作用嘅，可惜煲呔曾只識東施效顰，最後咪又係得啖笑囉！貓紙就係貓紙，煲呔曾依家只係將一張張嘅貓紙換上高科技、電子版嘅「貓Pad」，唔同嘅亦只不過係呢張「貓紙」要用電啫！