嗱，英國《經濟學人》雜誌評估咗全球四十個國家同地區善終服務嘅質素、成本同服務普及程度之後，得出一項「善終指數」，即管睇吓香港同新加坡各自表現係點。

估都估到香港表現好極有限啦。果然冇錯，英國排第一，香港僅得第二十位，比中國內地好啲啲。除咗輸畀排第十四嘅台灣，最激氣嘅係，宿敵新加坡高兩位排第十八，香港又再輸畀人，真係吹啤啤。

生活質素就聽得多，究竟乜嘢係「死亡質素」？何為「善終指數」呢？按研究組織解釋，呢啲都同善終服務有關。譬如生命教育嘅普及程度，社會對絕症病人關注程度，求助人獲得所需服務嘅困難程度，佢哋痛楚有冇得到有效紓緩等等。

有社福機構人士話，台灣早就將生命教育列為必修課程，港府喺呢方面明顯落後。亦有善終服務組織批評港府冇加強宣傳教育，導致公眾對善終服務同喪葬事宜冇正確認識。另外，資源方面嚴重不足，遠遠滿足唔到需求。

叮！依家全港十八個區得十間公立醫院提供善終服務，病床加加埋埋唔夠三百張，好多區例如新界北咁，一直都冇增設服務，隨着人口老化，對服務需求愈來愈大，但當局一於少理。無論教育、服務定資源提供都肥佬，「善終指數」唔低就怪咯。

講開教育，舊年就爆過一鑊瘀嘢啦。有間善終服務店因為舖頭名用咗個好深好僻嘅古字，食環署誤以為有「殯儀」嘅意思，拒絕發牌。政府帶頭為善終服務設置障礙，唔怪得指數排名慘不忍睹啦。「死亡質素」每下愈況，當局關人個關，骨灰龕一位難求，卒之咪搞到老人家百年歸老之後難以入土為安囉。

正所謂衰開有條路，中國社科院啱啱公布全球城市綜合競爭力排行榜，香港雖然微升一級排第十，勉強擠入「十強」，但新加坡排名第八，又一次騎住香港。

輸多次預咗啦，新加坡今年第二季經濟增長近兩成，全年增長預測更大幅上調到一成半，而學者對本港經濟增長嘅預測，最樂觀都只係得百分之五點八。齋睇數字，香港已經輸到貼地。

計太一叮話齋，新加坡政府有作為，有承擔，話做就去做；港府施政畏首畏尾，拖得就拖，除咗等運到，等阿爺放水，乜都唔識做。樣樣執輸慘過敗家，香港邊有運行吖？