廉政專員湯顯明（Timothy，即甜湯）前晚孖住前入境處助理處長陳詠梅（Helen）出席中策集團主席馬時亨嘅飯局，令呢段官場「地下情」曝光，更成為中環嘅熱門話題。不過，同甜湯關係密切嘅保安局局長李少光尋日就繼續口密，好cool咁話：「呢單嘢，我都唔係好清楚喎！」
商務及經濟發展局局長劉吳惠蘭尋日喺立法會出現，對件事嘅回應係：「我唔識陳詠梅喎！」同甜湯經常交手嘅保安事務委員會副主席、白鴿黨涂謹申就話：「好震驚！」因為佢唔知呢段「地下情」喎，但就認為兩個人結合係好事，仲話欲知詳情，就一定要搵兩人嘅前上司葉劉淑儀嘞，事關兩人都係葉劉提攜嘅！
個波去咗葉劉度，佢卻繼續玩神秘：「拍拖？我離開咗政府先至知咋，以前我哋做上司嘅，下屬做到嘢就得啦，我唔理下屬嘅私生活嘅！」但係有可靠消息人士爆料，話當年葉劉同甜湯做保安局正、副局長期間，每逢假期，甜湯經常話要返大陸打高爾夫球，上得咁密，據講係為咗約會佳人。