本文重點
下禮拜就係一年一度嘅書展，白鴿黨主席鐵頭仁近日出咗本新書，仲印咗一千本，打算喺書展重錘出擊。不過，喺政改一役，唔少激進年輕人圍佢，視佢為發洩對象，搞到鐵頭仁都改變去書展駐場簽書嘅大計，仲唔知講笑定認真咁話：「費事啲『80後』買咗書之後，即刻喺我面前燒！」
怕激進80後攪亂檔
又係嘅，書展場內人山人海，如果有激進「80後」踩場，分分鐘攪亂檔攤，鐵頭仁退一步都係明智嘅。不過，佢啲黨友就講笑咁質疑佢另有恐懼，事關書展有好多性感G模，鐵頭仁同佢哋對壘真係毫無勝算，有人更話：「唔通着游泳褲同佢哋撼過咩！」
點都好，鐵頭仁呢本《謙卑的奮鬥》注定要靜悄悄面世，佢尋日搵咗黨友幫手派書，點知社民連嘅黃毓民照樣嚟踩場，鐵頭仁好禮貌咁送本寫咗「毓民兄，請指正」嘅書畀佢，毓民接過後，連消帶打咁還句：「本書有冇講到投共嘅情節o架？」