本文重點
馬會主席陳祖澤（John）尋日榮休，適逢馬季煞科，亦係佢最後一次以馬會主席身份出席賽馬日，本來少不了離情別緒，但佢嘅愛駒「好運得福」喺最後一場煞科賽奪冠，帶挈主人袋逾三十五萬，亦為阿John嘅主席生涯畫上完美句號，事關今次係阿John做馬會主席以嚟第一次拉頭馬，難怪佢話希望退下主席位之後，運氣會好啲。
頭箍小姐讚記憶力驚人
開賽前，阿John先出席法國國慶酒會，席間巧遇「頭箍小姐」財經事務及庫務局常秘區璟智，頭箍小姐大爆八二年加入政府做政務官，當時任職首席助理銓敍司嘅阿John負責教新丁，仲話阿John一嚟，就將十幾位新人嘅姓名背到琅琅上口，記憶力驚人，講講吓都忍唔住讚句:「佢（John）係高人嚟㗎！」
轉數出名高嘅阿John一聽，即刻半開玩笑咁話：「我得五呎一吋高，點算係高人！」引到大家都忍唔住笑。