立法會休會前夕，煲呔曾日前去咗交呢個立法年度最後一次答問大會功課，仲喺議會中同社民連議員火併，佢搬出議事廳曾經掛過嘅一句中世紀法文「Honi soit qui mal y pense」（言行惡毒會自食其果）嚟教訓對手。不過，煲呔曾拋書包講法文露咗底，畀人揶揄佢唔鹹唔淡，當住全香港人出醜，好心煲呔曾咪唔識扮識，冇咁大個頭就唔好戴咁大頂帽啦。
煲呔曾嘅法文有乜問題呢？學咗一年法文嘅白鴿黨李華明尋日話，日前煲呔曾喺議事廳讀嗰句法文時，發音唔多掂，完全唔覺煲呔曾講緊法文囉，反而主持會議嘅立法會主席稍後重複一次，講得仲似啲。呢件事令人諗起以前有個廣告，內容話有個人懶叻咁講法文問候對方，對方唔知佢講乜，仲反問：「啊！今晚打老虎？」呢個笑話嘅現代版，就由煲呔曾真人示範嘞！
講開煲呔曾，最近建仔嘅陳克勤帶住新界青年聯會上京讀國情研習班，授課老師之一係「新護法」王振民，克勤仔同王振民閒談時，問到政改一役煲呔曾參與度係咪唔多夠？據講新護法唔敢亂答，只係數番政改「五部曲」，似乎佢都明白克勤仔暗寸煲呔曾「廢廢哋」。