本文重點
要進入年輕人嘅世界，互聯網係最佳嘅橋樑，可惜好多人都畀電腦難倒。政改一役，白鴿黨流失部分基礎選民，又遭到年輕勢力柴台，佢哋都忽然醒覺要打年輕人牌，開發年輕人社群，可惜第一步玩facebook，甚至瀏覽互聯網都難倒好多人，休會之後，主席鐵頭仁同「高達」李永達更打算拉隊學打倉頡。
望出番個「馬草泥」
高達話，佢家吓玩社交網站只係用英文，而鐵頭仁連facebook都未必識用，另外兩個立法會議員張文光同李華明亦一樣唔識打中文，所以要趁暑假惡補，依家佢隨身帶住張印有倉頡碼嘅貓紙，方便隨時溫習。佢承認相比起社民連，佢哋同年輕人的確脫晒節，所以今個暑假要「進修」，希望白鴿黨亦可以出番個「馬草泥」。
除咗惡補中文打字同電腦之外，白鴿黨嚟緊禮拜日會喺灣仔一間酒店辦路向營，首部分搵一國兩制研究中心總裁張志剛同傳媒人程翔主講，相信係討論個黨將來同政府及中央嘅關係；次部分就搵學者呂大樂解構「80後」現象，明顯係針對白鴿黨流失年輕選民而嚟。