本文重點
立法會尋日恢復二讀《最低工資條例草案》,一場修訂草案攻防戰亦喺議會上演,本來勞工界議員擬定幾個作戰計劃,打算修訂勞工及福利局提出嘅草案,包括工資水平幾耐檢討一次、暑假實習生豁免範圍等都要一一拗手瓜,可惜臨到埋門,先發覺墮入勞工及福利局局長張建宗同勞工處處長謝凌潔貞嘅無間道陷阱,搞到議員嘅計劃臨尾香,雙方過去嘅良好關係睇怕一鋪清袋都似。
「以為佢係正人君子」
今次嘅導火線係最低工資條例嘅幾個修訂建議,譬如勞工界希望訂立最低工資水平嘅委員會每年檢討一次,等最低工資水平可以追貼市場;甚至豁免海外實習員工時,要慎防本地大學生被剝削等。呢啲建議都同政府嘅構思意見相左,照常理政府應該盡量游說議員,甚至修訂自己嘅草案換取支持,不過,勞工界人士就透露佢哋中咗政府嘅無間道奸計。
點解會咁?據講,勞工界同謝太一向有溝通,曾經向佢表達過最低工資草案嘅意見,甚至曾經毫無保留咁談及勞工界喺議會嘅進攻策略,尤其係技術性嘅修訂內容,點知事後佢哋嘅意見冇被納入條例草案,張建宗反而忽然宣布調整提交修訂案嘅程序,呢一招好似攔網咁封住勞工界嘅計劃,令佢哋好無奈。
職工盟嘅李卓人同工聯會嘅王國興,近日講起修訂案就怨聲載道,李卓人更鬧政府出陰招,仲點名話張建宗:「以為佢係正人君子,點知出埋啲咁嘅陰招,真係要重新認識佢。」
勞工界同高官關係破裂雖然唔係新鮮事,但三年前嘅張建宗曾經係勞工界議員拍手歡迎嘅局長人選,家吓卻淪落到連「正人君子」都稱不上,真係夠晒諷刺!