事關重大，各學校都嚴陣以待，中一派位後就第一時間要小六學生返學校溫書，特別係狂操英文。其實，好多學校早喺一年前，學生啱啱升小六就安排佢哋惡補，每日放學後留低溫一粒鐘，全年風雨不改。校方攞歷屆編班試模擬試題畀學生做，溫到滾瓜爛熟為止。考試前半個月更係加碼，每日操三四粒鐘。

回歸後，特區政府愛國心爆棚，全力推動母語教學，點知搞到唔湯唔水，學生中英文都唔掂，更弊嘅係產生標籤效應，英中、中中壁壘分明。係人都知道，香港地不嬲重英輕中，家長都想自己嘅仔女英文誇啦啦，於是乎，英中招生打崩頭，中中就冇人吼。當局冇晒符，又話搞「微調」，批准部分中文中學開英文班，透過編班試分班。

嘩，直情係一試定生死！各小學有乜法子唔搏命逼學生惡補。咁就難為咗班細路咯。嗱，有啲小六生每日喺學校操練三粒鐘試題，返屋企又再溫習三粒鐘，仲要睇英文課外書。咁搞法，莫講話細路，就算大人都頂唔順。難怪好多學生都直言「壓力好大」。

小六學生其實一年要應付四次考試，編班試只係其中之一，仲有呈分試、畢業試、全港性系統評估，次次生死攸關。大佬呀，小六學生十一二歲咋，點可以承受咁大壓力！

講開又講，現時中小學生真係唔易做，事關班政府高官食飽飯冇事做，成日心血來潮搞乜嘢教育改革，一時話推動母語教學，一時又話要「微調」。又話要推行新高中學制，仲要開設冇人講得清楚學乜嘢嘅通識課程，總而言之，一波未平一波又起，將學生當白老鼠玩到殘。叮！

幼小嘅心靈點可以承受咁大壓力呀？難怪近年周不時有學生自殺，呢，近日就爆咗四單。據撒瑪利亞防止自殺會數字顯示，舊年十至十九歲青少年嘅自殺死亡個案，比○五年飆升四成三，其中學生自殺個案更比○八年增加一倍，當中唔少係不堪壓力輕生嘅。

太一叮忍唔住要問各位高官：你哋閉門造車推出一個個無厘頭改革嘅時候，有冇諗過，咁做會將學生推上絕路？如果自殺嗰個係自己嘅細路，你哋仲會唔會咁搞？