結伴睇戲去肥亨飯局

曾被人目睹與Helen結伴去鑽石山荷里活廣場睇戲嘅Tim湯，尋晚同Helen結伴去肥亨飯局，半公開大家關係。晚上六點五十七分，兩人並肩喺中環鬧市出現，放緊退休前休假嘅Helen拎住一袋禮物跟住Tim湯行。當抵達萬邦行馬車會會所樓下，Tim湯笑咪咪向Helen話：「係呢度嘞！」

Helen負責拎禮物，湯顯明緊隨其後急步入。

湯顯明飯局後同Helen登上廉政專員專車BE5515離開，載Helen返回堅道寓所。

不過，佢哋一見到記者就即刻彈開。記者問Tim湯係咪嚟賀肥亨，有冇同肥亨一齊打高球？佢竟然扮到乜都唔知，一臉愕然咁話：「我唔知馬生（馬時亨）請客喎。」咁再問佢係咪同Helen拍拖時，佢一味傻笑，仲拿拿臨同Helen步入。

兩人留到夜晚十點十分離開，出嚟嘅時候仲見到新聞處處長黃偉綸，後來Tim湯同Helen就登上廉政專員專車BE5515離開，載Helen返回堅道寓所。不過，Tim湯並冇送Helen上樓，Helen落車後獨自步行一小段，返回堅道金谷大廈寓所，佢警覺性甚高，一步三回頭，唔通驚畀人跟蹤？

查實Tim湯同Helen友情深厚，話說男方喺九九年至○三年間出任保安局副局長（後改稱保安局副秘書長）時，已認識當時喺入境處嶄露頭角嘅Helen，而Helen琴棋書畫樣樣精，堪稱紀律部隊才女，回歸後更成為首位女助理入境處長添！Helen同Tim湯同愛打高球，更結伴返內地打波，未知係咪因為咁，擦出火花？