朱育誠係前新華社香港分社副社長，同好多溫和泛民都有偈傾，港澳研究所於○三年五十萬人上街反對《基本法》第二十三條後成立，標榜研究港澳地區形勢同落實一國兩制方針，所以同終極普選聯盟嘅學者有唔少接觸。早前盛傳普選聯嘅兩位教授陳健民同葉健民獲邀上京，就係朱育誠從中拉攏，雖然最後唔成事，但就暴露咗兩者關係密切。

上書推銷白鴿黨區會方案

知情人士透露，羅祥國一直將溫和泛民主派嘅意見帶畀朱育誠，又會轉述中央嘅睇法。正如喺煲呔曾同「五區公投」發言人余若薇辯論前夕，羅祥國都有透過朱育誠上書北京，指煲呔曾會喺辯論大敗，原政改方案嘅支持度亦會因而大跌，要本港政制有轉機，白鴿黨嘅區會方案會係最後下台階。佢仲喺報告分析，如果今次政制再次原地踏步，溫和民主派一定全軍覆沒，一係輸咗議席，一係就會被迫加入激進派，咁四年後本港再討論政制問題，掣肘就會更大，希望中央再三考慮白鴿黨方案。

有普選聯成員認為羅祥國呢個「假設」係中央肯讓步嘅主因，覺得佢功不可沒。雖然羅祥國同朱育誠為泛民搭通天地線，但喺政改談判過程中，「中間人」何其多，邊個功力最深，邊一招先令中央回心轉意，旁人實在好難揣測到。