早前先踢爆政務司司長唐唐嘅「家臣」廠商會立法會議員林大輝，喺佢本議員通訊嘅封面，大字標題盛讚唐唐「政改方案、締造歷史」，擺明當自稱都有為政改通過出過力嘅煲呔曾冇到。
大輝尋日喺立法會答問大會向煲呔曾提問時，煞有介事咁話「我想恭喜你，喺你領導下二○一二年政改方案終於順利通過！」似乎係想為自己擦鞋擦得太出面補鑊。唔知今次係大輝自發咁做，定係有人喺背後叫佢一定要咁講呢？
補完鑊之後，隨即問番佢爭取咗好耐嘅稅務條例改革問題，要求政府容許港廠喺內地廠房嘅機器折舊扣減利得稅，但煲呔曾就叫佢直接搵財經事務及庫務局局長陳家強傾。
大輝話佢已經搵過好多個部門同局長，都解決唔到有關問題，要求煲呔曾親自督師搞掂佢，煲呔曾就好冷淡咁話：「我都未必做得到喎。」梗係啦！煲呔曾出名記仇兼小家，大輝之前咁樣落佢面，梗係冷待佢啦！